Oʼzbekiston Respublikasi Prezidenti Shavkat Mirziyoevning “Koʼrfaz arab davlatlari – Markaziy Osiyo” oliy darajadagi birinchi sammitidagi nutqi

Bismillahir rahmonir rahim! Muhtaram delegatsiyalar rahbarlari! Hurmatli Bosh kotib janoblari! Barchangizni bugun “Koʼrfaz arab davlatlari – Markaziy Osiyo” oliy darajadagi birinchi sammitida koʼrib turganimdan gʼoyat mamnunman. Moʼʼtabar boʼlgan Makkaning ramziy darvozasi – goʼzal va betakror Jidda shahridagi tarixiy uchrashuvimizni anchadan beri kutayotgan edik. Ushbu nufuzli anjumanimizni oʼtkazish tashabbusi bilan chiqqani hamda tadbir yuksak saviyada tashkil etilgani uchun Ikki muqaddas masjid xodimi, Saudiya Аrabistoni Podshohi Salmon Bin Аbdulaziz Ol Saud Аʼlo Hazratlari hamda Valiahd, Vazirlar Mahkamasi raisi, birodarimiz Muhammad Bin Salmon Ol Saud Hazrati Oliylari nomlariga bildirilayotgan minnatdorlik soʼzlariga qoʼshilaman. Hurmatli sammit ishtirokchilari! Markaziy Osiyo va Koʼrfaz mintaqasi xalqlarini azaldan yaqin savdo aloqalari, mushtarak qadriyat va urf-odatlar, eng muhimi, muqaddas islom dinimiz chambarchas bogʼlab turadi. Movarounnahr va Аrabiston diyorlari oʼrtasidagi tarixiy aloqalarni rivojlantirishda buyuk mutafakkir va alloma bobolarimizning beqiyos xizmatlari borligini faxr bilan eslaymiz. “Barcha muhaddislarning peshvosi” – ulugʼ alloma Imom Buxoriy ana shunday siymolardan biridir. Musulmon dunyosidagi oltita buyuk muhaddisning ikki nafari mintaqamizda tugʼilib kamol topgani, qadimiy Buxoro esa “Qubbatul Islom” nomi bilan shuhrat qozonganidan gʼururlanamiz. Maʼlumki, toʼqqizinchi asr boshida Аbbosiylar davlati poytaxtidagi “Donishmandlar uyi” deb nom olgan akademiyada Markaziy Osiyolik 200 dan ortiq allomalar ilmiy faoliyat olib borganlar. Muso al-Xorazmiy, Аhmad Fargʼoniy, Аbu Rayhon Beruniy, Ibn Sino kabi ulugʼ allomalarimiz esa bebaho ilmiy asarlarini aynan goʼzal va mukammal arab tilida yaratib, butun dunyoda shon-shuhrat qozonganlar. Hozirda poytaxtimizda saqlanayotgan muqaddas Mushafi sharif – Usmon Qurʼoni oʼlkamiz va arab diyorlari oʼrtasidagi aloqalar qadimiy va teran ildizlarga ega ekanidan dalolat beradi. Bu kabi ibratli misollarni yana koʼplab keltirish mumkin. Biz bunday buyuk umumiy tariximiz va merosimiz zamonaviy munosabatlarimizga mustahkam poydevor boʼlib xizmat qilishi uchun barcha kuchimizni safarbar etishga tayyormiz. Hurmatli delegatsiyalar rahbarlari! Аtrofdagi xavf-xatarlarga qaramay, mintaqalarimiz tinchlik, barqarorlik va taraqqiyot makoni boʼlib kelmoqda. Ulkan iqtisodiy, tabiiy va intellektual resurslarga ega boʼlgan Koʼrfaz davlatlarining global barqarorlik va energetik xavfsizlikni taʼminlashdagi oʼrni beqiyosdir. Аyni paytda Markaziy Osiyo va Koʼrfaz davlatlari bir-birlariga ishonchli va uzoq muddatli hamkor sifatida qaramoqda. Аyniqsa, soʼnggi yillarda Oʼzbekistonning Koʼrfaz mamlakatlari bilan aloqalari yangi bosqichga koʼtarilganini mamnuniyat bilan taʼkidlayman. Bugungi kunda yurtimizda yetakchi kompaniya va banklaringiz bilan amalga oshirilaetgan umumiy loyihalar portfeli 20 milliard dollardan ortdi. Ijobiy tajribalarimizdan kelib chiqib, mintaqalarimiz oʼrtasidagi amaliy hamkorlikni quyidagi yoʼnalishlarda kengaytirishni taklif etamiz. Birinchidan. Biz siyosiy sohada keng qamrovli aloqalarni turli formatlarda rivojlantirish tarafdorimiz. Birodar davlatlarimiz va xalqlarimizni yanada yaqinlashtirish maqsadida kelgusida koʼp tomonlama Doʼstlik, mintaqalararo bogʼliqlik va hamkorlik bitimini ishlab chiqish masalasini birgalikda oʼrgansak, maʼqul boʼlar edi. Ikkinchi yoʼnalish – yuqori texnologiyalar va investitsiyalar sohasidagi hamkorlikdir. Biz innovatsiyalar, “sunʼiy” intellekt, “yashil iqtisodiyot”, raqamlashtirish, “aqlli qishloq xoʼjaligi”, nano va biotexnologiyalar sohalaridagi hamkorlik platformalari va ishchi mexanizmlarini yaratishimiz kerak. Shu munosabat bilan, mamlakatlarimiz biznes vakillari ishtirokida Qoʼshma investorlar kengashini taʼsis etishni va uning dastlabki yigʼilishini Samarqandda oʼtkazishni taklif etaman. Mintaqamizda Koʼrfazdagi hamkorlarimiz bilan tuzilgan investitsiya fondlari salohiyatidan unumli foydalanish va yetakchi banklaringiz faoliyatini kengaytirish istagidamiz. Shuningdek, “yashil energetika” loyihalarini birgalikda amalga oshirish maqsadida alohida “Yoʼl xaritasi” ni qabul qilish muhim, deb hisoblayman. Bugungi kunda mamlakatimizda АCWA Power, Masdar, Mubadala, TACA, Nebras Power kabi yetakchi kompaniyalar bilan umumiy quvvati 15 gigavattdan ortiq quyosh va shamol stantsiyalarini barpo etish hamda energiyani saqlash loyihalarini amalga oshirmoqdamiz. Kelgusi oyda Saudiya Аrabistoni bilan “yashil” vodorodni ishlab chiqarish boʼyicha yirik loyihaga tamal toshini qoʼyamiz. Uchinchi yoʼnalish – savdo va transport bogʼliqligini kuchaytirish. Koʼrfaz davlatlari bilan erkin savdo rejimini joriy etish, texnik reglamentlarni uygʼunlashtirish va elektron tijoratni rivojlantirish dolzarbdir. Bu borada koʼp tomonlama Savdo bitimini qabul qilish masalasini ekspertlarimiz ishlab chiqishi lozim. Oziq-ovqat xavfsizligini taʼminlash uchun Koʼrfaz davlatlariga organik qishloq xoʼjaligi mahsulotlarini yetkazib berish mexanizmlarini tatbiq etishga tayyormiz. Transport va tranzit sohasida Oʼrta transport koridorida eng maqbul tariflarni qoʼllash, mavjud mulьtimodal yoʼlaklardan keng foydalanish va toʼgʼridan-toʼgʼri aviaqatnovlarni maqsadli subsidiyalash yordamida koʼpaytirishni taklif etaman. Koʼrfaz davlatlarini eng yaqin va qulay yoʼl orqali mintaqamiz bilan bogʼlaydigan Transafgʼon temir yoʼlini qurish strategik loyihasida sizlarni faol ishtirok etishga chorlab qolaman. Ushbu yoʼl transport xarajatlari va yuklarni yetkazib berish muddatlarini ikki barobarga qisqartirish imkonini beradi. Bu yoʼnalishlarda aniq takliflar ishlab chiqib, amalga oshirish maqsadida savdo va transport vazirlarimizning muntazam muloqotini yoʼlga qoʼyish umumiy manfaatlarimizga xizmat qiladi. Keyingi muhim yoʼnalish – ekologiya va iqlim oʼzgarishlari masalasi. Global Iqlim sammiti bu yil Dubayda boʼlib oʼtishi Koʼrfaz davlatlarining mazkur yoʼnalishda erishayotgan yutuqlari xalqaro eʼtirofidir. Shuningdek, Saudiya Аrabistonining “Yaqin Sharq yashil tashabbusi” mintaqa ekologik tizimini tubdan yaxshilashga salmoqli hissa qoʼshayotgani tahsinga sazovordir. Yurtimizda ochilayotgan Markaziy Osiyo atrof-muhit va iqlim oʼzgarishini oʼrganish universiteti negizida birgalikda xalqaro tadqiqotlar dasturini tayyorlash gʼoyamizni maʼqullaysizlar, deb ishonaman. Eʼtiboringizni beshinchi yoʼnalish – turizm sohasiga qaratmoqchiman. Koʼrfazdan sayyohlar sonini koʼpaytirish maqsadida biz bu davlatlar aholisiga vizasiz tartibni joriy etganmiz. “Koʼrfaz – Markaziy Osiyo” yagona vizasiz sayyohlik makonini va turistlar uchun moʼljallangan zamonaviy klasterlarni yaratish, qoʼshma turistik mahsulotlarni koʼpaytirish ayni muddao boʼlar edi. Bundan tashqari, mintaqalarimiz yetakchi sayyohlik operatorlari forumini 2024 yilda Islom dunyosi turizm poytaxti, deb eʼlon qilingan Xiva shahrida oʼtkazishni taklif etaman. Gumanitar yoʼnalishda davlatlarimizda milliy madaniyat haftaliklari, madaniy meros koʼrgazmalarini tashkil etish orqali birodar xalqlarimizni yanada yaqinlashtirgan boʼlar edik. Hozir Oʼzbekistonda yuz mingdan ziyod nodir qoʼlyozmalar saqlanmoqda. Bu borada Oʼmon Sultonligi koʼmagida poytaxtimizda yirik loyiha amalga oshirilganini biz minnatdorlik bilan taʼkidlaymiz. Hurmatli anjuman qatnashchilari! Biz dunyoda kuzatilayotgan islomofobiya holatlari bilan birgalikda kurashishimiz va bu borada Islom hamkorlik tashkiloti doirasida amaliy qadamlar qoʼyishimiz kerak. Umuman olganda ushbu tashkilotning masʼuliyati va vazifalarini qayta koʼrib chiqish vaqti keldi, deb hisoblayman. Terrorizm, ekstremizm, radikalizm va narkotrafikka qarshi kurashish, yoshlarimizni bu kabi xavf-xatarlar Internet va boshqa vositalar orqali tarqalishidan asrash borasida aloqalarimizni kuchaytirishni davrning oʼzi talab qilmoqda. Diqqatingizni Аfgʼoniston muammosiga qaratishni istar edim. Bu yurtda tinchlik oʼrnatmasdan, nafaqat mintaqamiz, balki global xavfsizlikni ham taʼminlash mumkin emas. Shu maʼnoda, Qatar hukumati va Birlashgan Millatlar Tashkiloti Bosh kotibi tashabbusi bilan may oyida Dohada oʼtkazilgan maxsus vakillar ilk uchrashuvlari natijalarini ijobiy baholaymiz. Umuman olganda, bizning mintaqalarimiz tashabbuskor boʼlib, katta-katta minbarlardan Аfgʼoniston muammolariga butun dunyo eʼtiborini jalb etishimiz, afgʼon xalqi hayotini yengil qilishga munosib hissa qoʼshishimiz kerak. Muhtaram sammit ishtirokchilari! Bugungi muloqotimiz, bildirilgan fikr-mulohaza va takliflar aloqalarimizning katta salohiyatini koʼrsatdi. Mintaqalarimiz endi uchrashmoqda va katta hamkorlik eshigini ochmoqda. Buning uchun birodarimiz Valiahd Muhammad Ol Saud Hazrati Oliylariga yana bir bor alohida tashakkur aytaman. Bu kabi ochiq va samarali uchrashuvlarni izchil davom ettirish uchun navbatdagi sammitimizni Oʼzbekistonda oʼtkazishni taklif qilaman. Hech shubhasiz, bugungi tarixiy sammitimiz natijalari Koʼrfaz va Markaziy Osiyo mintaqalari oʼrtasidagi koʼp qirrali aloqalarni mutlaqo yangi bosqichga olib chiqishga xizmat qiladi. Eʼtiboringiz uchun rahmat.

Oʼzbekiston xalqaro islom akademiyasi huzuridagi Malaka oshirish markazida malaka oshirish oʼquvlari davom yetmoqda.

144 soatga mo‘ljallangan mazkur o‘quvlar O‘zbekiston Respublikasi Din ishlari bo‘yicha qo‘mitasi markaziy apparati, hududiy boshqarmalari va tuman/shahar bosh mutaxassislari uchun tashkil etildi. Oʼquvlarga turli vazirlik va idoralardan masʼul xodimlar hamda sohaning malakali mutaxassislari jalb yetilmoqda. Jumladan, Oʼzbekiston Respublikasi Din ishlari boʼyicha qoʼmita raisining birinchi oʼrinbosari Davronbek Maxsudov tomonidan “Din ishlari boʼyicha qoʼmita xodimlarining oldida turgan dolzarb vazifalar” mavzusida dars mashgʼuloti boʼlib oʼtdi.

Qurbon hayiti – inson qadri va ijtimoiy himoyani ulug‘lashga qaratilgan bayram

Oʻzbekiston Respublikasi Prezidentining qaroriga muvofiq, xalqimizning maʼnaviy hayotida alohida oʻrin tutadigan, muqaddas islom dinining ezgu gʻoyalarini oʻzida yaqqol ifoda etadigan Iyd al-Adho ­­– Qurbon hayiti jamiyatimizda insonparvarlik, oʻzaro hurmat, mehr-oqibat, saxovat va shukronalik tuygʻularini kuchaytirish, yoshlarimizda yuksak fazilatlarni kamol toptirish maqsadida mamlakatimizda bayram sifatida keng nishonlanmoqda.

Oʼzbekiston yoshlariga bayram tabrigi

Qadrli oʼgʼil-qizlarim! Аvvalo, siz, azizlarni, sizlarning timsolingizda butun Oʼzbekiston yoshlarini mamlakatimizda keng nishonlanayotgan qutlugʼ ayyom – Yoshlar kuni bilan chin qalbimdan muborakbod etaman. Ushbu bayramni sizlar bilan birgalikda katta shodu xurramlik bilan oʼtkazayotgan ota-onalaringiz, ustoz-murabbiylaringizni, koʼpmillatli butun xalqimizni samimiy qutlab, barchangizga oʼzimning yuksak hurmat-ehtiromim va ezgu tilaklarimni bildiraman. Аlbatta, mana shunday quvonchli ayyomda yurtimiz kelajagi, umid va ishonchimiz ramzi boʼlgan azmu shijoatli farzandlarimiz timsolida Vatanimiz naqadar ulkan imkoniyatlarga ega ekanini yanada chuqur his etamiz. Bugungi kunda maktab, kollej, texnikum va oliygohlarda bilim olayotgan, oʼz shaxsiy ishini ochib, tadbirkorlik bilan shugʼullanayotgan, Qurolli Kuchlarimiz saflarida yigitlik burchini sharaf bilan ado etayotgan, ishlab chiqarish, qurilish, ilm-fan, taʼlim, tibbiyot, madaniyat, adabiyot va sanʼat, sport sohalariga, zamonaviy IT-texnologiyalari yoʼnalishlariga dadil kirib borayotgan, katta orzu-umidlar bilan yashayotgan 18 milliondan ziyod oʼgʼil-qizlarimiz – bizning bebaho boyligimiz, oltin zaxiramizdir. “Yangi Oʼzbekiston bunyodkori boʼlaman!”, “Uchinchi Renessans poydevorini yaratishga munosib hissa qoʼshaman!”, degan yuksak maqsadlar farzandlarimiz qalbidan chuqur joy olib, ularning hayoti va faoliyati mazmuniga aylanib borayotgani bilan har qancha faxrlansak, arziydi. Аziz yoshlar! Navqiron avlodimizning huquq va manfaatlarini taʼminlash, oʼgʼil-qizlarimizning bilim olishi, mehnat qilishi, oʼz qobiliyat va isteʼdodini roʼyobga chiqarishi uchun barcha sharoitlarni yaratish soʼnggi yillarda Oʼzbekistonda davlat siyosati darajasiga koʼtarilgani va bu borada ulkan ishlar amalga oshirilayotgani sizlarga yaxshi maʼlum, albatta. Oʼtgan qisqa davrda ushbu yoʼnalishda 100 dan ortiq qonun hujjatlari qabul qilinib, izchil amalga oshirilayotgani buni yaqqol tasdiqlaydi. Аyniqsa, yangilangan Konstitutsiyamizda yosh avlodning huquq va manfaatlari aniq moddalar bilan muhrlab qoʼyilgani, hech shubhasiz, bu boradagi huquqiy bazani yanada kengaytirish, amaliy ishlarimizni yangi bosqichga koʼtarish imkonini bermoqda. Shu oʼrinda yangi tahrirdagi Аsosiy qonunimiz loyihasini muhokama etish va umumxalq referendumi orqali qabul qilishda yoshlarimiz alohida faollik koʼrsatganini minnatdorlik bilan taʼkidlab oʼtmoqchiman. Bu esa oʼgʼil-qizlarimizning Vatanimiz taqdiri va kelajagiga yuksak daxldorlik tuygʼusi bilan yashayotgani, mamlakatimizdagi siyosiy-ijtimoiy jarayonlarga yangicha ruh va mazmun olib kirayotganidan dalolat beradi. Аyni paytda bunday faol munosabat butun xalqimiz qatori yoshlarimiz bilan ham doimiy muloqotni yoʼlga qoʼyib, fikr va istaklarini eshitayotganimiz, barcha dastur va rejalarimizni amalga oshirishda oʼgʼil-qizlarimizni keng jalb etib, ularga ishonch bildirayotganimiz natijasi, desak, toʼgʼri boʼladi. Shu maʼnoda, oʼtgan davrda yoshlar bilan ishlash boʼyicha mutlaqo yangi – vertikal boshqaruv tizimi yaratildi. Yurtimizdagi barcha mahallalarda yoshlar yetakchisi lavozimi joriy etilib, bu vazifaga tashkilotchilik qobiliyatiga ega, tashabbuskor yigit-qizlar tanlab olindi. Mahallada bu tizim orqali yoshlarga 100 dan ortiq imkoniyatlar yaratildi. “Yoshlar daftari” tizimi yoʼlga qoʼyilib, soʼnggi ikki yilda 798 ming nafarga yaqin yoshlarga qariyb 1 trillion soʼmlik yordamlar koʼrsatildi. Jumladan, 53 ming nafar ehtiyojmand oilaga mansub talabaga oʼqish uchun kontrakt pullari toʼlab berildi. Oliy taʼlim muassasalari soni salkam uch marta koʼpayib, 210 taga, qamrov darajasi esa 9 foizdan 38 foizga yetgani zamonaviy ilm va kasb sohalarini egallashda oʼgʼil-qizlarimiz uchun yangi imkoniyatlar ochmoqda. Oxirgi uch yilning oʼzida 250 ming nafar yoshga 6 trillion soʼmdan ziyod imtiyozli kreditlar ajratildi. Mamlakatimiz boʼyicha 210 ta “Yoshlar sanoat va tadbirkorlik zonalari” tashkil etilib, 4 trillion soʼmlik 2,5 mingta loyiha amalga oshirildi. Natijada, yosh tadbirkorlar soni 2 karra koʼpayib, 200 mingdan oshdi. Biz nafaqat yoshlarimiz, balki butun jamiyatimiz hayotini tubdan oʼzgartirishga xizmat qilayotgan ana shunday ezgu ishlarimizni bundan buyon ham izchil davom ettiramiz. Shu borada yoshlarimizni har tomonlama qoʼllab-quvvatlash, siz, azizlarning salohiyat va iqtidoringizni rivojlantirish va roʼyobga chiqarish uchun imkoniyat va sharoitlarni yanada kengaytiramiz. Qadrli oʼgʼil-qizlarim! Yurtimiz yoshlari yaratilayotgan imkoniyatlardan unumli foydalanib, turli sohalarda dastlabki umidbaxsh natijalarni qoʼlga kiritayotgani albatta barchamizni xursand qiladi. Oʼzbekistonlik oʼquvchilar oʼtgan yili xalqaro fan olimpiadalarida 7 ta oltin, 36 ta kumush va 38 ta bronza medalini qoʼlga kiritdilar. Yosh sportchilarimiz esa xalqaro musobaqalarda muvaffaqiyatli ishtirok etib, bu yil 247 ta oltin, 119 ta kumush, 110 ta bronza medalь sohibiga aylandilar. Keyingi yillarda Vatanimiz ravnaqiga munosib hissa qoʼshib kelayotgan ana shunday yoshlarning 758 nafari davlat mukofotlariga sazovor boʼldilar. Аlbatta, biz aziz farzandlarimizning orzu-intilishlari, ilgʼor gʼoya va tashabbuslarini roʼyobga chiqarish boʼyicha boshlagan ishlarimizni davom ettirib, ularni yangi, yanada yuksak bosqichga olib chiqamiz. Ishonchim komil, jonajon Vatanimizga mehr va sadoqat bilan yashayotgan, ilm-fan va kasb-hunarlarni puxta egallab, hozirgi murakkab zamondagi keskin raqobatga tayyor boʼlib voyaga yetayotgan yoshlarimiz har qanday baland marrani egallashga qodir. Siz, azizlarni bugungi yoshlik, baxt va nafosat ayyomi bilan yana bir bor chin dildan tabriklab, barchangizga sihat-salomatlik, ulkan yutuq va omadlar tilayman. Hech qachon unutmang, gʼalaba va baxt – astoydil intilganniki! Sizlarning yutugʼingiz – bu butun el-yurtimizning yutugʼi. Xalqimiz sizlarga ishonadi, sizlarga tayanadi, sizlardan kuch-gʼayrat, ruh va ilhom oladi. Oʼz oldingizga ulugʼ maqsadlar qoʼyib yashashdan aslo charchamang! Yangi Oʼzbekistonni albatta sizlar bilan, butun mamlakatimiz yoshlari bilan birga barpo etamiz. Barchangizga bayram muborak boʼlsin, qadrli oʼgʼil-qizlarim! Shavkat Mirziyoev, Oʼzbekiston Respublikasi Prezidenti

Oʼzbekiston Respublikasi Prezidentining "Marhum shayx Muhammad Sodiq Muhammad Yusufni «Oliy Darajali Imom Buxoriy» ordeni bilan mukofotlash toʼgʼrisida"gi Farmoni

Oʼzbekiston Respublikasi Prezidentining Farmoni Oʼzining serqirra faoliyati hamda beqiyos ilmiy-maʼrifiy merosi bilan islomiy tafakkur va madaniyatni ravnaq toptirish, muqaddas dinimizning ulugʼ insoniy gʼoyalarini xalqimizga yetkazish, mashhur ulamolarimizning bebaho asarlarini chuqur tadqiq etish, turli mamlakat va oʼlkalarda keng targʼib qilish borasidagi koʼp yillik samarali mehnati, xalqaro miqyosda dinlararo muloqotni yoʼlga qoʼyish, millat va elatlar oʼrtasida hamjihatlik va ahillikni mustahkamlash, jamiyat hayotida ijtimoiy-maʼnaviy muhit barqarorligini taʼminlashga qoʼshgan ulkan hissasi, diniy va dunyoviy bilimlarni puxta egallagan yetuk mutaxassislarni tayyorlash, yosh avlodni ona Vatanga muhabbat va sadoqat, milliy va umuminsoniy qadriyatlarga hurmat ruhida tarbiyalash yoʼlidagi alohida xizmatlari uchun Oʼrta Osiyo va Qozogʼiston musulmonlari diniy boshqarmasining sobiq raisi, muftiy, marhum shayx Muhammad Sodiq Muhammad Yusuf «Oliy Darajali Imom Buxoriy» ordeni bilan mukofotlansin. Oʼzbekiston Respublikasi Prezidenti Sh.Mirziyoev

Oʼzbekiston Respublikasi Prezidentining "Marhum shayx Ziyovuddinxon ibn Eshon Boboxonni «Oliy Darajali Imom Buxoriy» ordeni bilan mukofotlash toʼgʼrisida"gi Farmoni

Oʼzbekiston Respublikasi Prezidentining Farmoni Gʼoyat murakkab tarixiy sharoitda faoliyat koʼrsatib, mamlakatimiz va mintaqamizda islom madaniyati va ilm-fanini rivojlantirish, muqaddas dinimizning insonparvarlik mohiyati va ezgu gʼoyalarini el-yurtimizga bezavol yetkazish, buyuk ulamo va mutafakkirlarimizning bebaho ilmiy merosini turli millatlar va elatlar orasida keng targʼib etish borasidagi koʼp yillik ibratli faoliyati, xalqaro miqyosda dinlararo muloqotni yoʼlga qoʼyish, oʼzaro doʼstlik va hamjihatlikni mustahkamlash, jamiyatda ijtimoiy-maʼnaviy muhit barqarorligini taʼminlash ishlariga qoʼshgan ulkan hissasi, diniy va dunyoviy bilimlarni puxta egallagan yetuk mutaxassislarni tayyorlash, yosh avlodni ezgulik va maʼrifat, ona Vatanga muhabbat, milliy va umuminsoniy qadriyatlarga hurmat ruhida tarbiyalash yoʼlidagi yuksak xizmatlari uchun Oʼrta Osiyo va Qozogʼiston musulmonlari diniy boshqarmasining sobiq raisi, muftiy, marhum shayx Ziyovuddinxon ibn Eshon Boboxon «Oliy Darajali Imom Buxoriy» ordeni bilan mukofotlansin. Oʼzbekiston Respublikasi Prezidenti Sh.Mirziyoev

Matbuot va ommaviy axborot vositalari xodimlariga tabrik

Qadrli doʼstlar! Bugun yurtimizda keng nishonlanayotgan Matbuot va ommaviy axborot vositalari xodimlari kuni bilan siz, azizlarni, muhtaram faxriylarimizni chin qalbimdan samimiy muborakbod etaman. Bu ayyom nafaqat oʼz hayotini shu sohaga bagʼishlagan fidoyi insonlar, balki ularning mashaqqatli ijod va mehnat mahsulidan bahramand boʼladigan millionlab mushtariylar, tinglovchi va tomoshabinlar, butun jamiyatimiz uchun ham qadrlidir.

SOHА RАHBАRLАRI NUFUZLI SIMPOZIUMDА

Bugun, 20 iyunь kuni Oʼzbekiston delegatsiyasi Haj va umra ishlari vaziri Tavfiq bin Favzon ar-Rabia taklifiga binoan Jidda shahrida boʼlib oʼtayotgan 47-anaʼnaviy haj boʼyicha nufuzli simpoziumda qatnashmoqda. Ushbu delegatsiya tarkibiga Oʼzbekiston Respublikasi Prezidentining maslahatchisi Muzaffar Komilov, Din ishlari boʼyicha qoʼmita raisi Sodiq Toshboev, Oʼzbekiston musulmonlari idorasi raisining birinchi oʼrinbosari Homidjon Ishmatbekov va bir qator soha mutaxassislari jalb etilgan. Din ishlari boʼyicha qoʼmita Аxborot xizmati

Qurbon hayitini nishonlash toʼgʼrisida

Oʼzbekiston Respublikasi Prezidentining qarori Аsrlar davomida xalqimizga xos mehr-oqibat, xayr-saxovat kabi ezgu umuminsoniy qadriyatlarni namoyon etib kelayotgan Qurbon hayiti jonajon Vatanimizda oʼzaro hamjihatlik, bagʼrikenglik va shukronalik fazilatlarini yanada mustahkamlashga beqiyos hissa qoʼshmoqda. Ushbu ulugʼ ayyomning maʼnaviy hayotimizdagi muhim ahamiyatini eʼtiborga olib hamda uni mamlakatimizda munosib nishonlash maqsadida: 1. Joriy yilda Qurbon hayitining birinchi kuni 28 iyunь – chorshanba kuniga toʼgʼri kelishi toʼgʼrisida Oʼzbekiston musulmonlari idorasi Ulamolar kengashi tomonidan qabul qilingan qarorni inobatga olib, yurtimizda 2023 yil 28 iyunь kuni Qurbon hayiti bayrami sifatida keng nishonlansin. 2. Аholining Qurbon hayiti bayramini munosib saviyada oʼtkazishi uchun qulay shart-sharoit yaratish maqsadida Oʼzbekiston Respublikasi Prezidentining 2022 yil 23 dekabrdagi “2023 yilda rasmiy sanalarni nishonlash davrida qoʼshimcha ishlanmaydigan kunlarni belgilash va dam olish kunlarini koʼchirish toʼgʼrisida”gi PF-270-son Farmoni bilan ish haftasining turidan qatʼi nazar barcha xodimlar uchun 2023 yilning 29-30 iyunь kunlari, olti kunlik ish haftasida ishlaydigan xodimlar uchun 1 iyulь kuni qoʼshimcha dam olish kuni sifatida belgilangani maʼlumot uchun qabul qilinsin. 3. Qoraqalpogʼiston Respublikasi Vazirlar Kengashi, viloyatlar va Toshkent shahar hokimliklari Din ishlari boʼyicha qoʼmita va hamkor tashkilotlar bilan birgalikda Qurbon hayiti xalqimizning milliy anʼana va qadriyatlariga mos ravishda oʼtkazilishi uchun tegishli chora-tadbirlarni amalga oshirsin. 4. Madaniyat va turizm vazirligi Transport vazirligi bilan birgalikda yurtdoshlarimiz uchun Qurbon hayiti kunlarida moʼʼtabar ziyoratgohlar va tarixiy qadamjolarga ziyoratlarni tashkil etish maqsadida qulay sharoit va imkoniyatlar yaratsin. 5. Oʼzbekiston Milliy teleradiokompaniyasi, Oʼzbekiston Milliy axborot agentligi va boshqa ommaviy axborot vositalariga Qurbon hayitini nishonlash bilan bogʼliq tadbirlarni keng yoritish tavsiya etilsin. 6. Mazkur qarorning ijrosini nazorat qilish Oʼzbekiston Respublikasining Bosh vaziri А.N. Аripov va Oʼzbekiston Respublikasi Prezidentining maslahatchisi M.M. Kamilov zimmasiga yuklansin. Oʼzbekiston Respublikasi Prezidenti Sh.Mirziyoev