2018 йил 21-22 май кунлари Ўзбекистон Республикаси давлат органлари делегацияси Остона шаҳри (Қозоғистон) да БМТ нинг Марказий Осиё учун превентив дипломатия бўйича минтақавий маркази (РЦПДЦА) ва БМТ нинг Терроризмга қарши кураш бўйича бошқармаси томонидан ташкил этилган "Зўравонликка асосланган экстремизм ва терроризм тарқалишига шароит яратаётган омилларнинг бартараф этилиши" мавзуидаги минтақавий семинарда иштирок этди.

Семинарда, шунингдек, Қирғизистон, Тожикистон ва Туркманистондан келган делегациялар ҳам иштирок этди. Афғонистон ва Россия давлатлари семинарнинг кузатувчи иштирокчиси сифатида қатнашдилар.

Ўзбекистон Республикаси делегацияси аъзолари Дин ишлари бўйича қўмита консультанти Б.Қодиров ва Бош прокуратура ахборот-таҳлил бўлими катта прокурори Х.Максудовлар Ўзбкистонда экстремизмга қарши курашиш борасида олиб борилаётган ишлар юзасидан маълумот бердилар. Жумладан, кўпдинли ва кўпмиллатли бўлган Ўзбекистонда тинчлик ва ҳамжиҳатликнинг сақланиши йўлида комплекс чора-тадбирлар олиб борилаётганлиги, терроризм ва диний экстремизмга қарши кураш ва виждон эркинлигини таъминлашга қаратилган қонунчилик доимий равишда такомиллаштириб борилаётганлиги қайд этилди.

Ўзбекистоннинг ушбу йўналишдаги қонунчилик, ҳукумат томонидан тасдиқланган аниқ тадбирлар режалари, шунингдек, ушбу соҳада амалга оширилган ишлар тўғрисида тақдим этган маълумотлари халқаро экспертлар томонидан ижобий қабул қилинди.

Ҳозирги кунда миллатларо тотувлик ва тинчликни таъминлаш, экстремизм ва терроризмнинг ҳар қандай кўринишларига қарши курашишда минтақавий ҳамкорлик муҳим аҳамият касб этиб, мазкур семинар бунинг давомий эканлигидан далолат беради.